Jer 10 | NdeIBE | STEP | Zwana okutshiwo nguJehova kuwe, wena ndlu ka-Israyeli.

Jeremiah 10

UNkulunkulu Lezithombe

1 Zwana okutshiwo nguJehova kuwe, wena ndlu ka-Israyeli.

2 UJehova uthi: “Lingazifundi izindlela zezizwe loba lethuswe yizibonakaliso zasemkhathini, lanxa nje izizwe zisethuswa yizo.

3 Ngoba imikhuba yabantu iyize; bagamula isihlahla ehlathini, ingcwethi isibaze ngetshizela yayo.

4 Bayasicecisa ngesiliva langegolide; basibethele ngesando langezipikili ukuze singanyikinyeki.

5 Njengezinto zokwethusa endimeni yamakhabe, izithombe zabo azikhulumi; kumele zithwalwe ngoba azingeke zihambe. Lingazesabi; azingeke zenze okubi; lokuhle azingeke zikwenze.”

6 Kakho ofana lawe, wena Jehova; wena umkhulu, lebizo lakho lilamandla amakhulu.

7 Ngubani ongeke akwesabe, wena Jehova wezizwe? Lokhu kukufanele. Phakathi kwabantu bonke abahlakaniphileyo bezizwe lakuyo yonke imibuso yabo, kakho onjengawe.

8 Bonke kabalangqondo njalo bayizithutha; bafundiswa yizithombe zezigodo eziyize.

9 Isiliva esikhandiweyo siyalethwa sivela eThashishi legolide livela e-Ufazi. Okwenziwe yingcwethi lomkhandi wegolide kugqokiswa okuluhlaza lokulubende – njalo konke kwenziwe zingcitshi.

10 Kodwa uJehova unguNkulunkulu oqotho; unguNkulunkulu ophilayo, iNkosi yanininini. Lapho ethukuthele, umhlaba uyagedezela; izizwe azingeke zimelane lolaka lwakhe.

11 “Batshele lokhu uthi: Onkulunkulu laba, abangawenzanga amazulu lomhlaba, bazabhubha emhlabeni langaphansi kwamazulu.’ ”

12 Kodwa uNkulunkulu wenza umhlaba ngamandla akhe; wawumisa umhlaba ngokuhlakanipha kwakhe njalo wanweba amazulu ngokuqedisisa kwakhe.

13 Lapho eqaqamba, amanzi asemazulwini ayahlokoma; wenza amayezi aphakame evela emikhawulweni yomhlaba. Uthumela umbane ulezulu njalo akhuphe umoya eziphaleni zakhe.

14 Umuntu wonke kalangqondo njalo kalalwazi; wonke umkhandi wensimbi uyangiswa yizithombe zakhe. Izithombe zakhe ziyinkohliso; kazilamphefumulo phakathi kwazo.

15 Ziyize, izinto zenhlekisa nje; lapho ukwahlulelwa kwazo sekufikile, zizabhubha.

16 Yena oyiNgxenye kaJakhobe kafani lalaba, ngoba unguMenzi wezinto zonke, kubalwa lo-Israyeli, isizwe selifa lakhe – ibizo lakhe nguJehova uSomandla.

Ukubhujiswa Okuzayo

17 Qoqani impahla yenu ukuba lisuke elizweni, lina elihlezi livinjezelwe.

18 Ngoba uJehova uthi: “Ngalesisikhathi ngizabaphosela phandle labo abahlala kulelilizwe; ngizabehlisela usizi ukuze bathunjwe.”

19 Maye mina ngenxa yokulimala kwami! Inxeba lami kalelapheki! Ikanti ngazitshela ngathi, “Lo ngumkhuhlane wami, njalo kumele ngiwubekezelele.”

20 Ithente lami lidiliziwe; izintambo zalo zonke ziqumekile. Amadodana ami asukile kimi njalo kawasekho; kakho oseleyo ukuba angimisele ithente lami loba ongangilungisela amakhetheni ami.

21 Abelusi kabalangqondo njalo kabambuzi uJehova; ngakho kabaphumeleli, njalo lemihlambi yabo yonke ihlakazekile.

22 Lalelani! Umbiko uyeza – ukuxokozela okukhulu okuvela elizweni lenyakatho! Kuzakwenza amadolobho akoJuda achitheke, abe yizikhundla zamakhanka.

Umkhuleko KaJeremiya

23 Ngiyazi, O Jehova, ukuthi ukuphila komuntu akusikho kwakhe; umuntu akusikho kwakhe ukuthi aqondise izinyathelo zakhe.

24 Ngiqondise Jehova, kodwa kube ngokulunga – kungabi ngolaka lwakho, hlezi ungenze ngibe yize.

25 Yehlisela ulaka lwakho phezu kwezizwe ezingakwamukeliyo, phezu kwabantu abangakhuleki ebizweni lakho. Ngoba bamdlile uJakhobe; bamdlile waphela bachitha lelizwe lakhe.